說到底，（街頭）攝影同生活一樣，係一場孤獨既遠行。除左真係要行唔少路之外，亦係一場自我既修行。

攝影唔單止記錄，亦係對世界既一種評價。隨著當代歷史價值觀既改變，有關攝影方面既美學亦隨之產生變化，然而，總有人會透過相機呢個媒介去擾動、批判、挑戰當時主流既美學觀同社會體制；又或者視之為一種溝通媒介，藝術地再現人對內在情緒或外界事物既特殊感受，為觀眾提供新既視角。

不過，攝影既普及同樣亦帶黎困擾。時至今日，大部分人都一機在手，人人都可以係攝影師，甚至自稱為藝術家，攝影亦因而被引申出好多種用途，例如：作為證明、新聞（紀實）攝影、藝術創作、滿足虛榮心、政治工具等，難免會引起唔同信條之間既討論，而當中最大既爭辯，大概係：攝影屬於藝術創作（個人想法比較重要）定還是忠於事實、紀錄（世界比較重要），無論係邊種觀點，主流定非主流，都係一個時代或群體既寫照，背後有各自既集體意識所支撐，並冇好壞，更冇必要係答辯當中作二元法既區分，都值得被凝視。

正因為攝影有相當多元化既面向，最重要係知道自己既「象限」同定位。相片最終既功能都係向觀眾展示你所察覺或發現到既野，所以係無形之中，影像可以控制我地視覺法則既同時，亦誘導我地感知外界既方式，然而，隨住年齡既增長，每個人都係學習進步、成功失敗既過程中，不斷累積人生閱歷，對事非對錯、對自己、對他人、對世界都會有自己既一套價值觀同睇法，所以，只要你對攝影係有持續既熱情，願意為左可以影到你想影既效果而練習，任何題材都可以係拍攝對象，無論你最終既目的係想選擇「獲取認同」，定還是「追求意義」，最重要係能夠認清自己既位置，遵從自己既內心，明白自己該影些什麼，以及為了什麼而去影。

未必所有人一開始就肯定自己要行攝影呢條路，更唔係個個都會為攝影架上任何既主題或標籤，畢竟，世事無絕對，況且好多時攝影師都係自己一個人攞住部相機，係萬籟俱寂既時侯展開靈感變幻既旅程。

有關（街頭）拍攝既分享暫時係此處作個小結，往後將分享其他有關攝影方面既內容。

每個人既生命裡頭都會有令自己精彩難忘既事，同攝影相處既過程或許係孤獨既，唯願攝影可以成為你人生中其中一樣會去享受做既事，共勉之。

“你知道人為什麼要拍照嗎？”

“有人為了記錄，為了不讓自己忘記。”

“亦有人拍照是為了讓自己放心地去忘記…”