上一篇就講到從傳統相機結構去理解快門喺吸光方面同光圈有咩唔同，而今次就會從圖像效果角度探討。

好多時，你眼前既畫面只係一瞬之間，轉瞬即逝，我地無可能因為快門速度唔夠快令到張相炒左而重新再嚟多次，所以喺拍攝之前，多方面嘗試快門速度有助於你掌握自己所需要既影像效果。特別當你想確保自己能夠捕捉到一ｄ重要時刻，請務必妥善咁去設定快門速度，尤其當你拍攝快速移動既物體時。

籠統咁講，快門速度可被分為高速快門同慢速快門。

以舞蹈攝影為例：仔細咁觀察舞者及其舞蹈，假如你希望張相有種「凍結」舞者係舞蹈入面某個瞬間，或者姿態，你可以利用高速快門，譬如調校快門至千份之一秒，縮短每張圖像曝光既秒數，瞬速咁「截取」光線，嚟捕捉「瞬間」既時刻。圖中上兩幅就係高速快門既效果。

若然，你係想補捉舞蹈既軌跡，一種運動形態，你就可以利用慢速快門，譬如調校快門至十份之一秒，透過延長每張圖像曝光既秒數，去讓感光元件一直觀看舞者持續地動作，過程中舞者動作之間會不斷重疊，令圖像最終睇起上嚟有種線性動態，以一種動態模糊既效果創造出一種肉眼無法睇到既舞蹈感。圖中下圖就係慢速快門既效果。

同一樣野，唔同人都會有佢獨有既理解、想法，相片亦如是，無論你選擇以高速快門去企圖捕捉一瞬之間，定還是以慢速快門留住事物移動既軌跡，你都開啟左各種敘事既可能性。總之反覆練習，將熟練變成經驗既一種，咁樣你想影到心目中既畫面就會大大提高。