昨晚蘋果一路發佈，公司股價就一路跌，明顯投資者不覺蘋果今年新機有乜突破，所以喺股價上不買帳。

正如我曾經為文講過，Samsung 每隔幾年，總結左d生產經驗後，總有一代機較為「完美」；而蘋果就相反，每隔幾年，就有一年特別水皮，對上一次係2018年。

而今年2023年，明顯係一部過渡機，為明年摺機做熱身做測試！

今年新機最重要既變動就係改用甚麼鈦金屬物料，令機身較輕，我一聽呢個消息，即刻明白蘋果部署緊乜！畢竟，一部大摺機差不多等於1又1/2部常態機，重量係一個問題（Samsung 部fold 好重下），如果呢方面無一個突破既方案減輕重量，Apple所有流動電子產品喺外形設計方面就會長期處於樽頸。

科技既野大家都知，你點產前測試都好，都會有漏洞，蘋果成日update IOS 版本，就因為部機行落去發覺唔係硬體粒CPU 有問題就係軟件有bugs ，所以要更新。對蘋果而言，摺機對公司係歷史性，一旦推出後有乜嘢差池，日後所有產品就會全覆沒；但只要行通，將來又可以年年更新一款，先嚟細摺機、再嚟大摺機，再嚟摺iPad ，iPad 咁多款，有排摺！咁樣玩法，又可以玩多7年！問你死未！

今年新機d顏色，特別隻灰色……我第一眼望到，就諗起中國解放後頭三十年既色系，呢隻色，大有可能引發內地人慎終追遠之情懷而搶購之，可能蘋果係咁諗。

我懷疑隻新物料難上色，蘋果未硏發好，所以顏色方面有d綁手綁腳。

至於部機整多個側鍵，比你自置功能，花巧野！有違多年使用iPhone 簡約方便之慣性，開頭玩下幾好，長期你會唔理粒掣，仲嫌阻訂！

又至於Type C 插口，我到而家都無感，咪愛嚟义下電傳下數據啫！d媒體成日講到好關鍵，我一直都無期待過。

我本嚟已經話今年蘋果新機無得炒，而家睇埋發佈會，更加肯定。