講完森山大道，今次就帶大家認識一位風格同森山大道完全唔同，但同樣係（街頭）攝影呢個領域入面，有著莫大貢獻既攝影師 — Henri Cartier-Bresson（布列松）。係攝影史中，布列松係一個繞唔開既名，佢所撰寫既一篇關於（街頭）攝影睇法、心得、技術分享既文章 —《決定性瞬間》，更對後世影響至深至遠。

係布列松既世界觀入面：佢相信世間萬物都會出現「決定性瞬間」，認為當時只有攝影呢種手段，先可以將人世間最真實、事情中最關鍵既時刻凝結落黎。「決定性瞬間」係一種「客觀偶然」，意指可以構成一張令相既因素會係呢一瞬間，處於最協調、最均衡既狀態，個情境即係：當你「掃緊街」個陣，察覺到有件事正處於變化當中，而你亦同步走位，並能夠係最關鍵既時刻㩒快門制，係呢一電光火石既瞬間完成呢個快拍（snapshot）。

順帶一提，其實佢本人極度抗拒《決定性瞬間》呢個譯名，認為當時法文原版書名— Images à la sauvette（匆忙的影像）更貼近佢真正既想法：係（街頭）攝影既過程中，攝影師必須要係呢個充滿隨機性既生活場景入面觀察、預測、靜待最關鍵既時刻發生，並只有一瞬間既快拍（snapshot）將畫面元素同構圖同時整合起黎。粗略咁講，「決定性瞬間」呢套技法分別由時間、空間同意義，呢三個條件相互構成，缺一不可。大家就唔好咁傻豬豬，將佢直譯黎到去解咁片面。

首先，係時間方面：時間指對時機既掌握。Snapshot本來係一個狩獵詞彙，意指一種處於動態中快而準既射擊手法。雖然獵物既移動速度極快，大部分情況下獵人都冇足夠既時間去瞄準，但依然可以命中目標。對有過打獵為生經驗既布列松黎講，佢認為街頭攝影亦同理。雖然我地見到既畫面時刻都變化緊，創意表現既瞬間極為短暫，但攝影師仍然可以透過耐心等待、細心觀察、直覺以及熟練既攝影手法，去捕捉最關鍵既時刻，但要留意，佢從來冇講過佢係一個場景入面只會影一張相。

如上圖，1933年，布列松係西班牙塞維利亞港到所影既相當中，雖然最後揀左用筆圈住個兩張相，但佢其實總共影左16張。每件事既發展可能有好多個瞬間，但只有一個最關鍵既時刻，環境中既元素會排列成最具意義既幾何型態，佢認為呢個型態最能反映事件既完整面貌，你要做既就係捉住呢個最準確、最平衡既狀態，盡你所能將這一刻影底。

其次，係空間方面：空間指構圖，尤其是幾何。深受繪畫影響，布列松除左係構圖比例方面有著紮實既基礎，更癡迷於幾何結構，可以講幾何係佢既構圖觀，無論曲線、三角、圓形、方形、水平、垂直、對角線、引導線等，而我地都好容易從佢作品中睇到：事情發展至最關鍵既個一刻，正處於幾何上最平衡既狀態。

另一方面，佢好在意畫面資訊既有效性。佢有一條眾所周知既原則 -「絕不裁切相片」，但其成名作《聖拉札赫車站後》就打破左呢個法準，只要唔影響相片資訊內容既真確性同傳意能力，佢係會對相片按畫面比例進行裁切，如下圖所示：

當時因為柵欄太窄，遮住左個鏡頭，導致相片左側有撻黑影（左圖），為左令睇既人更能將視線聚焦係事件本身，佢將干擾畫面既元素移除，對相片進行按比例既裁切（右圖）。

至於意義方面：即內涵既表達。布列松經常強調：要令事件產生新既「意義」或賦予事件「具意義」既時刻。淺白d講，看待事件既角度比事件本身重要。呢個位置，本文將會透過作品賞析，令大家更加清楚了解，佢點樣將「決定性瞬間」活靈活現咁演繹出黎，增加讀者對相片既思考空間。

布列松其中一個過人之處：即使身處係極為平常既地方，佢都能夠從中發現到一d巧妙既瞬間，並好準確咁將個刻「捕捉」落黎。深受繪畫影響既布列松曾提過，超現實主義係佢主要既靈感來源，從佢既作品中，我地可以隱約睇到佢將自己潛意識內、精神世界入面所追求既「虛構」畫面，以現實方式呈現，將現實世界發生緊既事，變成為種種不可思議既情景。就當時黎講，呢d新穎既畫面，無疑亦能為讀者提供一個新既觀看同思考角度。跟住落黎，本文嘗試歸納幾個切入點，令大家比較容易理解同掌握，當中包括：

1. 幾何形狀、色塊、線條

參照上圖，假如冇架單車經過（左圖），呢張只係一張普通既街景相，冇任何意義；相反，右圖中向下旋轉既樓梯，將讀者視線引導至畫面焦點到，除左為畫面增添多份動感之餘，有趣既係，主體亦岩岩好處於黃金分割既位置，完美既構圖比例令畫面變得和諧，而更加重要既係，呢張相精妙之處在於畫面內所有元素都「各得其所」，佢地係一種「具意義」既存在：踩單車既人、樓梯同街角係當下個一瞬間處於最協調、最均衡既狀態，天時、地利、人和同時決定左呢個咁不可思議既時刻，令呢張相有種「轉瞬即逝」既意味。

2. 重複出現既「符號」

上圖係佢其中一張既巧妙，又有趣味性既作品。事件既出現本身已經好不可思議：所有細路排列有序、動作亦好一致性咁向下望，而螺旋狀樓梯縱深向上，係黑白對比既情況下，令整個視覺衝擊感更為明顯，印象非常深刻。這張相，係佢其中一張好經典既超現實主義攝影代表作。

3. 日常、荒誕

相信呢個例子更加具體咁展示出繪畫同超現實主義對布列松既影響。無論身處係咩場景，佢總能發現到箇中既律動，每一次既快門，都似係一場精密既狩獵計劃。

4. 關於生死、永恆既題目

表面睇，上圖係構圖方面處理得相當優秀，主題亦相當明確，然而，相片背後卻隱藏左不可思議（超現實）既關鍵時刻（決定性瞬間）同訊息。相片較遠處其實係靈車，兩個小朋友跟住個車轆向靈車既相反方向跑，歡樂既小朋友、肅穆既氣氛；動與靜；生向左、死向右，光影底下，生命同死亡共存，而呢種正正就係布列松想要訴說既內涵。

雖然，我地依家睇佢d作品會覺得好正，但就當時黎講，佢都面對唔少批評，同森山大道一樣，佢既相就當時黎講亦有一定既爭議性，係一種〝另類〞既存在。有關佢既攝影，實在有太多方面值得大家去思考，深究，礙於篇幅所限，呢個位置就交返比大家自行作業啦。時至今日，攝影已經演變成一項好日常且低成本既行為，但同樣既一部相機比唔同人用，甚至面對同樣既場景，每個人影出黎既野都唔同，你擁有點既一套美學原則或者世界觀，你就會得到你自認為既「決定性瞬間」。無論點都好，布列松同森山大道都為我地提供左一個美好既幻想，我地應該保持一定既自信同謙卑，忠於自己，繼續叩問攝影獨特既地方。

Alex@Kerwin